एसपी रिपोर्टर
जनकपुरधाम, पुष १६ : आजबाट इस्वी संवतको नयाँ वर्ष सन् २०२४ शुरु भएको छ । नेपालीसहित विश्वभरका मानिसहरुले आपसमा शुभकामना आदान प्रदान गर्दै नयाँ वर्ष मनाइरहेका छन् । ग्रेगोरियन पात्रोअनुसार सन् २०२३ को विदाइ र नयाँ वर्ष सन् २०२४ को स्वागतमा विश्वभर विभिन्न कार्यक्रमहरु आयोजना भइरहेका छन् ।
यस अवसरमा जनकपुरधाम, धनुषा सहित मधेशका विभिन्न स्थानहरुमा पनि भब्यता र उल्लास देखिएको छ । पिकनिक स्थलहरुमा युवाहरु जम्मा भएर रमाइलो गर्नुका साथै जनकपुरधामको जानकी मन्दिर, महोतरीको जलेश्वरनाथ, सप्तरीको छिन्नमस्ता सखडा भगवती, कंकालिनी, बाराको गढिमाई, पर्साको गहवामाई सहितका सबै मन्दिरहरुमा स्थानिय पुजापाठ समेत गर्न पुगेका छन् । कमला नदीमा स्नान र पिकनिक गर्नेहरुको पनि घुइँचो आजको दिनमा लाग्छ ।
यशु ख्रीस्टको जन्म भएको वर्षदेखि पादरी ग्रेगोरियनले शुरु गरेकाले यसलाई ग्रेगोरियन पात्रो भन्ने गरिन्छ ।इस्वी संवतको नयाँ वर्षको अवसरमा नेपालमा पनि शुभकामना आदानप्रदान, सांगीतिक प्रस्तुतीलगायतका विभिन्न कार्यक्रमहरु भइरहेका छन् ।
नयाँ वर्ष मनाउन काठमाडौं, पोखरा, नगरकोट, धुलिखेल, चितवनको सौराहालगायतका स्थानहरुमा मानिसहरु भेला भएर नयाँ वर्ष मनाइरहेका छन् । ती स्थानका होटलहरु भरिभराउ छन् । विश्वभरका नेताहरुले नयाँ वर्षको शुभकामना दिँदै विश्वमा शान्ति र समृद्धिको कामना गरेका छन् ।
