एसपी रिपोर्टर
जनकपुरधाम, असोज २१ : जनकपुरधामको रामानन्दचौक स्थित जनकपुर बिग मार्टमा राति भिषण आगलागी भएको छ । जनकपुर उपमहानगरपालिकाको वडा नं. ९ मुख्य सडक छेउमै रहेको मार्टमा राति ११ बजे अकस्मात् लागेको आगो बिहान मात्र नियन्त्रणमा आएको छ । जनकपुरधाम उपमहानगरपालिका लगायत आसपासको पालिकाको बारुणयन्त्र, प्रहरी, स्थानीय लगायतको सहयोगमा आगलागी नियन्त्रण भएको हो ।
आगलागीबाट सम्पूर्ण सामान जलेर नष्ट भएको छ भने घरमा पनि क्षति पुगेको छ । सञ्चालक रामबाबु रायले राति ११ बजे मार्टभित्र अचानक आगो सल्केको थाहा पाएको बताए । मार्टको सामान साढे चार करोड, घरमा समेत क्षति पुगेकाले १० करोडभन्दा बढीको क्षति पुगेको सञ्चालक रायको दाबी छ । मार्टको दोस्रो तल्लामा आफुहरु बस्ने गरेको र दम्पतीले भागेर ज्यान बचाएको उनले बताएका छन् ।
