एसपी रिपोर्टर
जनकपुरधाम, भदौ २९ : संविधानसभाका अध्यक्ष तथा नेकपा एमालेका उपाध्यक्ष तथा संसदिय दलका उपनेता सुवास नेम्वाङको सम्झनामा नेकपा एमालेको जनकपुरधाम नगर कमिटीले श्रद्धाञ्जली सभाको आयोजना गरेको छ । जनकपुरधामको जनक चोकमा आयोजना गरिएको श्रद्धाञ्जली सभामा एमालेका नेता तथा कार्यकर्ताहरुले नेम्वाङलाई स्मरण गर्दै श्रद्धाञ्जली अर्पण गरे ।
उनीहरुले दिप प्रज्वलन र एक मिनेट मौन धारण गरि नेम्वाङ प्रति श्रद्धाञ्जली अर्पण गरे । एमालेको नगर कमिटि अध्यक्ष सुरेन्द्र भण्डारीको अध्यक्षतामा भएको श्रद्धाञ्जलीसभामा दर्जनौ नेता कार्यकर्ताहरुको उपस्थिति रहेको थियो । सो कार्यक्रममा नेम्वाङको व्यक्तित्व माथी समेत चर्चा गरेका थिए ।
सो अवसरमा पार्टी प्रदेश सांसद पल्टी देवी महरा नेता मोहम्मद कैश, श्याम पुर्वे नगरकमिटि उपाध्यक्ष सन्तोष महतो, सचिव राजु साह, दिप नारायण साह, रुका मिश्रा, जानकीराम साह, विजयेता झा सहितको उपस्थिती थियो ।
गत सोमबार मध्यराति घरकै शौचालयमा बेहोस भेटिएका नेम्वाङलाई लगत्तै शिक्षण अस्पताल महाराजगञ्जमा लगिएको थियो । जहाँ उनलाई चिकित्सकहरुले मृत घोषणा गरेका थिए । पशुपति आर्यघाटमा विहिबार छोराहरु मिङ्सो र सुहाङ नेम्वाङले दागबत्ती दिएर अन्तिम संस्कार गरे ।
