एसपी रिपोर्टर
जनकपुरधाम, साउन २९ : जनकपुरधाम स्थित प्रादेशिक अस्पतालमा प्रदेशमै उपलब्ध नरहेको संवेदनशिल उपचार सम्भव र सुरुवात भएको छ । अस्पतालमा केहि दिन अगाडि मात्र सुरु भएको मोडुलर शल्यक्रिया कक्षमा क्रोन लिभर डिजिज (लिभर सुक्रिने) रोगको निदानका लागि अपनाइने इसोफेजियल भ्यारिसेस ब्यान्ड लिगेशन (ईभिबिएल) सेवा सफलता पुर्वक सुरु भएको छ ।
पेट तथा ग्याष्ट्रो रोग विशेष डा. रामदेव चौधरीका अनुसार अस्पतालमा केहि दिन पुर्व सुरु भएको मोडुलर ओटी कक्षमा उपकरण जडान गरि सोमवार पहिलो विरामीलाई सम्पुर्ण उपचार सेवा निशुल्क रुपमा गर्दै सेवाको सफलता पुर्वक शुभारम्भ गरिएको छ । यो समस्या भएपछि पेटमा पानी जम्ने, नशाको सुजनहरु हुने, रगतको बान्ता हुने र कालो दिशा आउने गर्दछ ।
विरामीको ज्यानलाई नै खतरा हुने यस्ता विरामीहरुलाई यस अघि बाहिर रेफर गर्ने गरेकोमा अव प्रादेशिक अस्पतालमै यो सेवा उपलब्ध भएको र यो प्रदेशमै पहिलो भएको अस्पतालका प्रवक्ता डा. रामज्ञान यादव बताउछन् । (ईभिबिएल) गरेपछि रगत बग्ने समस्या बन्द हुन्छ र विरामीको ज्यान खतराबाट टाढा रहन्छ ।
बाहिर निजी अस्पतालहरुमा २५ देखि ३० हजार सम्ममा उपचार हुने यो सेवा अस्पतालमा अधिकतम छ हजार सम्ममा सम्भव हुने बताइएको छ । अस्पतालका निर्देशक डा. रामनरेश पण्डितको समेत उपस्थितीमा सोमवार पहिलो उपचार सफलता पुर्वक भएको डा. चौधरीले बताए । साथै प्रवक्ता डा. यादवका अनुसार भोली मंगलवार देखि हृदय रोगको पनि ओपिडी सुरु हुन लागेको छ भने मंगलवार र विहिवार ग्याष्ट्रोको पनि ओपिडी सेवा सुरु हुदैछ ।
