एसपी रिपोर्टर
जनकपुरधाम, साउन २४ :
प्रादेशिक अस्पताल जनकपुरधामले प्रयोगविहीन अवस्थामा रहेको मोडुलर ओटी (विशिष्ट शल्यक्रिया कक्ष) सञ्चालनमा ल्याएको छ ।
युरो जेनरल र अर्थो विशिष्ट शल्यक्रिया कक्ष सञ्चालनमा ल्याइएको प्रादेशिक अस्पतालका प्रवक्ता डा. रामज्ञान यादवले जानकारी दिए । उनले अब ल्याप्रोस्कोपी विधिबाट पनि बिरामीको शल्यक्रिया हुने उनले बताए ।
न्यूरो सम्बन्धी जनशक्ति अभावका कारण न्युरो ओटी सञ्चालनमा ल्याउन सकिएको छैन । ‘प्रादेशिक अस्पतालमा न्यूरो सम्बन्धी विशेषज्ञ छैन । हामीले खोजी गरिरहेका छौं । जनशक्ति भेटिए लगतै न्युरो सर्जरी पनि सुरु हुन्छ’, उनले भने ।
मधेश सरकारले करिब १० करोड खर्चेर तीनवटा मोडुलर ओटी एक वर्षअघि स्थापना गरेको थियो । २०७९ भदौ ३०मा तत्कालीन सामाजिक विकास मन्त्री नवलकिशोर साहले नवनिर्मित तीनवटा मोडुलर अपरेशन थिएटरको उदघाटन गरेका थिए ।
तर वर्षदिन बितेपनि समेत सञ्चालनमा ल्याउन सकिएको थिएन ।
हाल ३५० बेडको अस्पताल रहेकोमा सय बेड धान्ने जनशक्तिले चलिरहेको अस्पतालका प्रवक्ता डा. यादवले बताए ।
जनशक्ति पदपूर्ति नभएसम्म शल्यक्रिया बिहान ९ बजेदेखि साँझ ५ बजेसम्म मात्रै चल्ने उनले बताए
