एसपी रिपोर्टर
जनकपुरधाम, साउन १६ :
मधेस नेपालकै अन्न भण्डारको रुपमा चिनिन्छ । यद्यपि यस वर्ष वर्षा नै नभएकाले मधेसभरी खडेरी परेको छ । नेपालकै अन्न भण्डारको रुपमा रहेको मधेसमा खडेर परेकोमा एक कार्यक्रममा उपराष्ट्रपतिदेखि मुख्यमन्त्री, प्रदेशप्रमुख तथा नगरप्रमुखसम्मकाले चिन्ता व्यक्त गरेका छन् ।
महोत्तरीको मटिहानी नगरपालिकामा उपराष्ट्रपति रामसहाय प्रसाद यादवको नागरिक अभिनन्दन कार्यक्रममा उनीहरुले चिन्ता व्यक्त गरेका हुन् । यसका साथै कृषि प्रधान देश नेपालका लागि महत्वपूर्ण रहेको गाई भैँसीमा लाग्ने लम्पी स्कीन रोग समेत चिन्ताको विषय बनेको हो ।
कार्यक्रममा उपराष्ट्रपति यादवले वर्षा नहुँदा यस क्षेत्रका किसानका साथै आमजनताले धेरै समस्याको सामना गर्नु परि रहेकाले संवेदनशील भई समस्याको निराकरण गर्न तर्फ लाग्न प्रदेश सरकारलाई आग्रह गरे ।
सोही कार्यक्रममा सहभागी प्रदेश प्रमुख हरिशंकर मिश्रले अहिले जनप्रतिनिधिहरुको प्रमुख दायित्व पानीको समस्या समाधान गर्नु रहेको बताए । मधेसमा खडेरी परेपछि खेतीपाती गर्न समस्या भएकै छ त्यसमाथी चापाकलबाट पानी आउन छोडेको छ, प्रदेश प्रमुख मिश्रले भने ‘अहिले सिंचाईको समस्या समाधान गर्न सम्भव छैन, त्यसैले प्रत्येक जनता समक्ष खानेपानी कसरी पुग्छ त्यता तर्फ लाग्नुस मुख्यमन्त्री ज्यू ।’ आफ्नो परिवार र आफ्नो समाज मात्रैलाई नभई यहाँका जनताका लागि काम गर्न उनले सबै जनप्रतिनिधिलाई आग्रह गरे ।
मुख्यमन्त्री सरोजकुमार यादवले खडेरीको समस्या र लम्पी स्कीन रोगको प्रकोप मधेसमा विकराल रुप लिई सकेकाले मधेस सरकारले सो को विकल्पमा के उपाय हुन सक्छ त्यो कार्य गर्न तत्पर रहेको प्रतिवद्धता व्यक्त गरे । उनले भने ‘अहिले मधेसभरी खडेरी छ, चापाकलमा पानी आईरहेको छैन, खडेरीको समयमा कसरी खेतीपाती गर्न सकिन्छ त्यसकालागि विकल्प खोजीरहेका छौँ ।’ यस्तो समयमा नदिको पानी खेत खेतसम्म पुर्याएर हुन्छ कि डीप बोरिङ्गबाट पानी तानेर हुन्छ खेतीपातीका लागि सहज वातावरणको श्रृजना गरिने प्रतिवद्धता व्यक्त गरे ।
यसका साथै मुख्यमन्त्री यादवले प्रदेशका जनताको समस्या समाधान गर्नका लागि हेलो सिएम फोन नम्बर संचालनमा ल्याउन लागेको समेत जानकारी दिए ।
मटिहानी नगरपालिकाका नगरप्रमुख हरिप्रसाद मण्डलले मटिहानीको उर्वर भूमिमा समेत खडेरीका कारण धान रोपाईँ हुन नसकेकोमा चिन्ता व्यक्त गरे । उनले यो नगरलाई सुख्खा क्षेत्र घोषणा गरी विशेष राहतको व्यवस्था गर्न सरकारसंग माग गरे ।
