एसपी रिपोर्टर
जनकपुरधाम, जेठ १७ : धनुषाको शहिदनगर नगरपालिकामा जेष्ठ नागरिकलाई सम्मान गर्ने भनेर बोलाईएको भएपनि अपमान गरिएको दृश्यहरु देखिन्छ । सम्मान ग्रहणका लागि बोलाइएका त्यस्ता जयेष्ठ नागरिकहरुलाई जाबो बस्ने व्यस्थापन समेत नहुँदा उनीहरु भुइमै बसेको र कोहि सुतेको देखिन्छ ।
असार मसान्त नजिकिदै गर्दा प्रचण्ड गर्मीमा सम्मान थाप्न बोलाइएका बयोबृद्वहरुलाई आरामले बस्ने व्यवस्थापन त भएको छैन छैन भुईमा पल्टिरहेकी एक एक सिकिस्त बृद्वामहिलाबाट जबरदस्ती औठाछाप लिइरहेको तस्वीर समेत देखिएको छ ।
शहिदनगर नगरपालिकाले आयोजना गरेको जेष्ठ नागरिक सम्मान कार्यक्रममा ८० बर्ष भन्दा माथीका वृद्धवृद्धाहरुलाई बोलाएर सम्मान गरिएको भनिएको कार्यक्रमका यि तस्वीरहरुले उनीहरुलाई सम्मान भन्दा पनि औपचारिकता पुरा गर्न र सम्मानका लागि छुटयाइएको बजेट रफादफा गर्ने मनशाय प्रष्ट भइरहेको छ । सो सम्मान कार्यक्रमका लागि ९ लाख रुपैया बजेट चलाइएको स्रोतको दावी छ ।
मेयर दिनेश प्रसाद यादबले जेष्ठ नागरिकलाई फुलमाला लगाएर सम्मान गरेको तस्वीर पनि समाजिक सञ्जालमा नदेखिएको भने होइन तर यि भित्री तस्वीरहरुले वृद्ववृद्वाहरुको सम्मान भन्दा पनि पिडा देखाइरहेको छ । नगर प्रमुख यादवले जेष्ठ नागरिकहरुलाई सम्मान गरिरहँदा सोही नगरपालिकाका एक कर्मचारीले औपचारिकता र कागजात मिलाउन एक असक्त महिलासँग जबरदस्ती औँठाछाप लिरहेको दृश्य समेत समाजिक सँजालमा देखिएको छ ।
उपमेयर सुनिता सिँह र विभिन्न वडाका वडाध्यक्ष तथा कर्मचारीहरु समेत सम्मलित सो समारोहको क्रममा शहिदनगर नगरपालिकाको आईएमएस अपरेटर दिलिप कुमार महराले एक अति सिकिस्त विरामीसँग औँठा छाप लिरहेको देखिएको छ । जेष्ठ नागरिक सम्मानको लागि रजिष्टरमा कागजी प्रक्रिया र सँख्या पुरयाउनका लागि कर्मचारी महराले जेष्ठ नागरिकको नाउँमा एक सिकिस्त विरामी महिलाको औँठाछाप लिरहेको तस्विरहरु समाजिक सँजालमा राखेर स्थानीयहरुले विरोध जनाएका छन् । नेपाली काँग्रेसका युवा नेता शैलेन्द्र चोरवारले फोटो राखेर यो जेष्ठ नागरिकको सम्मान हो की अपमान ? भनेर प्रश्न गरेका छन् ।
