एसपी रिपोर्टर
जनकपुरधाम, चैत १५ : जिल्ला ट्राफिक प्रहरी कार्यालय धनुषाका प्रमुख प्रहरी निरीक्षक शेखर कुमार साहले धनुषाको ट्राफिक व्यवस्थापनका विषयमा स्थानिय सञ्चारकर्मीहरु संग सुझाव संकलन गरेका छन् । बुधवार विहान पत्रकारहरु संगको भेटघाटमा प्रहरी निरिक्षक साहले नगरभित्र ट्राफिक व्यवस्थापनका लागि धनुषा ट्राफिक प्रहरी निरन्तर खटिरहेको भन्दै गर्नुपर्ने सुधारका विषयमा सुझाव मागेका थिए । उनले नगरभित्र अब नो पार्किङ्गमा पार्क गर्ने गाडीहरुलाई ह्विल लक लगाएर व्यवस्थापन गरिने पनि बताएका हुन् ।
पत्रकारहरुले जनकपुरधाममको ट्राफिक व्यवस्थापनका लागि चुनौती जस्तै रहेको ईरिक्साको उचित व्यवस्थापन र संख्यात्मक समिक्षाका लागि पनि आग्रह गरेका थिए । प्रेस अंकित गाडीको दुरुपयोग, ईरिक्साको भाडा दररेट सहितका व्यवस्थापन गर्न समेत आग्रह गरेका थिए । कार्यक्रममा प्रहरी निरीक्षक साहले जनशक्ति बढाएर रामानन्द चोक, जानकी मन्दिर लगायतका क्षेत्रमा मात्र १० जनाको संख्यामा ट्राफिक प्रहरी निरन्तर खटिरहेको जानकारी दिए ।
जनकपुरधाम प्रदेशको राजधानी भएसँगै सवारी साधनको चाप बढेकाले ट्राफिक व्यवस्थापन मुख्य चुनौती बताउँदै उनले यसलाई आफ्नो कार्यकालभर सुधार गर्ने प्रतिबद्धता जनाए । नागरिकहरुलाई ट्राफिक सम्बन्धी थप जनचेतना जगाउने, अव्यवस्थित पार्किङ्गलाई व्यवस्थित गराउने, यातायात र यात्रुको निश्चित मापदण्ड बनाई कार्यान्वयन गर्ने र सवारी आवगमनलाई चुस्त र दुरुस्त बनाउने उनले बताएका छन् ।
ट्राफिक व्यवस्थापनमा ट्राफिक एक्लैले मात्र केही गर्न नसक्ने भन्दै सबैपक्षलाई साथ दिन उनले आग्रह गरे । पत्रकारहरुले ट्राफिक प्रहरीले गाँउका किसान र दुधवाला गाडी भन्दा अत्याधिक गतिमा चलाउने गाडीहरुलाई केन्द्रित गरेर अव व्यवस्थापन तर्फ लाग्नु पर्ने बताए ।
