एसपी रिपोर्टर
जनकपुरधाम, चैत ८ : मधेश प्रदेशको पहिलो सरकार बेटी पढाउ बेटी बचाउ अभियान चलायो र प्रदेशमा सामुदायिक विद्यालयकी छात्राहरुलाई साइकल वितरण गर्न थाल्यो । आकर्षक नामका कारण अभियानले चर्चा कमाएपनि अभियानका लागि साइकल किन्ने प्रक्रियामा अख्तियारले छापा मारेपछि भ्रष्टाचारको गन्धका कारण अभियान माथी नै प्रश्न उठयो । अहिले पुन: मधेश सरकारले छ करोडको झोला र औजारबक्स बाँडिरहेको छ ।
संघियता पछिको पहिलो मधेश सरकारको बेटी पढाउ बेटी बचाउ अभियानलाई देशभरिकै महिलाले मात्र होइन हरेक नागरिकले प्रारम्भमा प्रशंसा गरयो । घरको काम, मजदुरी, बाल विवाह र विभिन्न बाध्यतात्मक परिस्थिती र परिधीका कारण शिक्षाबाट बञ्चित मधेशकी चेलीहरुलाई विद्यालय प्रति आकर्षण गर्न सो अभियान अन्तर्गत धमाधम साइकल वितरण सम्म पनि अभियानले प्रशंसा पाएकै हो । तर जव साइकल किन्ने प्रक्रियामा भ्रष्टाचारको गन्ध छायो र अख्तियारले मुख्यमन्त्री तथा मन्त्रीपरिषदको कार्यालयमा छापामारी गरयो अभियानलाई बदनामी भएकै हो ।
हाल मधेश सरकारले फेरी कक्षा ९ का छात्र र छात्रा दुवैका लागि भन्दै एउटा ब्याग र गणित विषयमा काम लाग्ने एक औजार बक्स बितरण गरिरहेको छ । चैत ८ गते सम्म आईएमईएसमा दर्ता भएका मधेशका कुल ८६ हजार ५ सय २३ विद्यार्थीलाई मधेश सरकारले यो समान वितरण गरिरहेको छ । एक विद्यार्थीमा कर वाहेक ५ सय ८८ रुपैया खर्च गरिरहेको सरकार यो समाग्री वितरणमा कुल छ करोड खर्च गर्दैछ ।
मधेश सरकारका वर्तमान शिक्षा, विज्ञान, प्रविधी तथा बाणिज्य मन्त्री महेश प्रसाद यादवले यसअघिको सरकारले आरम्भ गरेको बेटी पढाउ बेटी बचाउ अभियान गलत नभएको बताउदै त्यसमा भएको गलत काम मात्र गलत भएको बताए । उनले अहिले वितरण भइरहेको झोला सहितका समाग्रीले समेत सामुदायिक विद्यालयमा विद्यार्थी आकर्षित हुने दावी गरे । ब्याग घर घरमा पुगेपछि मधेश प्रदेशको नामको पनि प्रचार प्रसार हुने दावी सरकारको छ ।
विद्यालयका प्रधानाध्यापकहरु पनि शैक्षिक समाग्री वितरणले सामुदायिक विद्यालयमा विद्यार्थीको आकर्षण बढने भन्दै खुसी व्यक्त गर्छन । अहिले प्रधानाध्यापकहरुको जिम्मा लगाइने गरेको यो समाग्री विद्यालयले विद्यार्थीहरुलाई वितरण गर्नेछ । गत फागुन २८ गतेबाट सुरु भएको झोला वितरण गर्ने काम हालसम्म सप्तरी, सिराहा, धनुषा, महोत्तरी र सर्लाही गरी पाँचवटा जिल्लाको ४६१ विद्यालयको ५६ हजार १६६ विद्यार्थीलाई झोला वितरण गरिसकिएको छ ।
निर्देशक फुयालका अनुसार सप्तरीका ८६ विद्यालयमा ९ हजार ९८१ वटा, सिरहाका ८७ विद्यालयमा १० हजार ८००, धनुषाका ९४ विद्यालयमा ११ हजार ९८३, महोत्तरीका ९७ विद्यालयमा ११ हजार ७६ वटा र सर्लाहीका ९७ विद्यालयका १२ हजार ३८९ वटा झोला वितरण गरिएको छ भने रौतहट, बारा र पर्सामा पनि चैतको दोस्रो साता भित्रै वितरण गरिने छ ।
झोला र औजार बक्स सहित करिव छ सय को समान पाउने लोभले विद्यार्थी आकर्षित हुने कुरा एक हिसावले सहिनै हो तर ति झोला ९ कक्षाका विद्यार्थी जस्ले करिव १० वटा किताव र थप कापीहरुको भारी बोक्नु पर्दछ उस्का लागि उपयुक्त हो त ? के साचिकै ति ब्याग होलसेलमा पाँच सय रुपैयामा उपलब्ध हुने गुणस्तरको हो त ? भन्ने कुराको पुष्टी प्रयोगमा आएपछि मात्र हुनेछ ।
