एसपी रिपोर्टर
जनकपुरधाम, चैत ५ : देशले दुईजना प्रतिनिधीसभा सदस्यहरुलाई राष्ट्रपति र उपराष्ट्रपतिको रुपमा पाइसकेपछि अव खालि भएका ति दुई क्षेत्रमा चुनावी चर्चा चुलिएको छ । त्यसमा पनि उपराष्ट्रपतिमा निर्वाचित भएका रामसहाय प्रसाद यादव चुनाव जितेको बारा–२ मा चुनावको चर्चा झनै तातिएको छ ।
सप्तरी २ मा जनमत पार्टीका अध्यक्ष डा. सिके राउतसंग चुनाव हारेका जसपा अध्यक्ष उपेन्द्र यादव आफु सांसद बन्नकै लागि रामसहाय जस्ता राम्रो छवि भएका नेतालाई उपराष्ट्रपतिमा सिमित गरिदिएको चर्चाका बिच अव सो क्षेत्रमा चुनावी सरगर्मी बढदै गएको छ ।
के छ, बारा २ मा सम्भावनाको खेल ?
राष्ट्रपति पुरुष हुँदा उपराष्ट्रपति महिला नै हुनुपर्ने दबाब र निर्वाचन आयोगको घोषणाका बाबजुद पनि जसपाले गठबन्धनमा चट्टानी अडान राखेर उपराष्ट्रपतिमा राम सहाय प्रसाद यादवलाई उम्मेदवार बनायो र उपराष्ट्रपतिमा जितायो पनि । जसपाको यो अडान भित्र अध्यक्ष उपेन्द्र यादवको व्यक्तिगत सांसद बन्ने स्वार्थ लुकेको चर्चा भएकै हो । तर जसपा अध्यक्ष यादवलाई भने अगामि निर्वाचन सजिलो हुने सम्भावना कम नरहेको विश्लेषण सुरु भइसकेको छ ।
उपराष्ट्रपतिको नतिजा आएकै दिन शुक्रवार रास्वपा, जनमत, लोसपा, नागरिक उन्मुक्ती पार्टी, नेपाल समाजवादी पार्टी र आम आदमी पार्टी सहितको सात दलिय गठबन्धनको अचानक घोषणा हुनुपनि बारा २ को चुनाव संग सम्बन्धित रहेको बताइन्छ । उपराष्ट्रपतिमा जसपाका उम्मेदवारलाई सहयोग नगरेर जनमतले उपनिर्वाचनमा जसपालाई साथ नदिने संकेत गरिसकेको छ । सो सात दलिय गठबन्धनले आफनै उम्मेदवार उठाउने तयारी भइरहेको एक नेताले भने ।
राजेन्द्र महतोको हल्ला के हो ?
नयाँ सात दलिय गठबन्धनबाट सम्भावित उम्मेदवार को हो हुन सक्छ ? एसपी खवरले गठबन्धनका एक नेतालाई गरेको प्रश्नमा परिस्थिती देखेर मात्र केहि भन्न सक्ने बताए । यद्यपि उनले कांग्रेस र माओवादीको सहयोगमा जसपा अध्यक्ष यादव उम्मेदवार बने सात दलिय गठबन्धनबाट लोसपाका वरिष्ठ नेता राजेन्द्र महतो पनि उपयुक्त पात्र हुन सक्ने बताए । संसदमा मधेशका लागि दुवैजना उतिकै महत्वपुर्ण भएकाले त्यो सम्भावना पनि नकार्न नसकिने उनको तर्क छ यद्यपि कांग्रेस र माओवादीको व्यवहारमा भर पर्ने उनले बताए ।
माओवादी ३ सय ५४ मतले मात्र पराजित भएको सो क्षेत्रमा माओवादी यदि जसपालाई समर्थन गर्छ भन्ने हाम्रो गठबन्धन पनि उपयुक्त पात्र ल्याउँछ नाम उल्लेख नगर्ने सर्तमा एक नेताले भने, ‘ त्यसपछि हामि यस्ता उम्मेदवार ल्याउँछौं जसलाई एमाले र कांग्रेसको पनि मत पर्न सक्ने सम्भावना हुन्छ ।’ त्यो पात्र राजेन्द्र महतो हो ? भन्ने प्रश्नमा उनले हेरौं भन्ने जवाफ दिए ।
त्यतिवेला जसपाकै रामकिशोर प्रसाद यादव, नेपाली कांग्रेसका रविन्द्रप्रसाद यादव र अरुण ज्ञवाली बागी उम्मेदवार बनेका थिए । रामकिशोरले ११ हजार ४३, रविन्द्रले १० हजार ७५० र अरुणले सात हजार ६९८ मत पाएका थिए । जनमत पार्टीबाट उठेका राजेश साहले दुई हजार ७२५ मत पाएका थिए ।
कांग्रेसका दुई जना बागी उम्मेदवार बन्दा माओवादीका शिवचन्द्रलाई घाटा लागेको थियो भने रामसहायप्रसाद थोरै मतान्तरले निर्वाचित भएका थिए । अहिले पनि कांग्रेस र माओवादीका नेताहरु पनि आफै चुनाव भिड्ने तयारीमा छन् । यदि कांग्रेस र माओवादी सत्ता र सरकारकै लागि आत्मसम्पर्ण गरि जसपालाई उम्मेदवार बनायो भने हाम्रो नयाँ गठबन्धनले एमालेलाई पनि मान्य हुने उम्मेदवार ल्याउने र त्यसमा महतो नाम चर्चामा रहेको नेताहरु स्वीकार गरेका छन् ।
