लक्ष्मीनियाँ गाउँपालिकामा एमालेबाट निर्वाचित जनप्रतिनिधिद्वारा अनिश्चितकालीन धर्ना

एसपी रिपोर्टर
जनकपुरधाम, फागुन ३० :
धनुषाको लक्ष्मीनियाँ गाउँपालिकामा नेकपा एमालेबाट निर्वाचित जनप्रतिनिधिहरू मंगलबारदेखि अनिश्चितकालीन धर्ना सुरु गरेका छन् ।
आफूहरूले कार्यालयमा लगाएको ताला फोडेर कार्यालयका सामग्रीहरू हिनामिना गरिएको आरोप लगाउँदै ती जनप्रतिनिधिहरुले मंगलबारदेखि अनिश्चितकालीन धर्ना सुरु गरेका हुन् ।
आफूहरूले तालाबन्दी गरेको दुई दिनपश्चात गाउँपालिका अध्यक्ष भोगेन्द्र मिश्रले सम्पूर्ण जनप्रतिनिधिलाई बोलाएर समस्या समाधानका लागि पहल गर्ने प्रतिबद्धता जनाएपनि अहिलेसम्म कुनै समन्वय नगरेकाले बाध्य भएर गाउँपालिकाको कार्यालय अगाडि धर्नामा बस्न बाध्य भएको वडा नम्बर–१ का वडाध्यक्ष दिलिप यादवले बताए ।
गत फागुन १४ गते प्रमुख प्रशासकिय अधिकृत र लेखाशाखाको कर्मचारीको कार्यकक्षमा वडाध्यक्षहरूले लगाएको ताला फोडेर कार्यालयका महत्वपूर्ण सामानहरू हिनामिना गरिएको वडाध्यक्ष यादवले आरोप लगाएका छन् ।
उनले सरुवा भइसकेका प्रमुख प्रशासकीय अधिकृत यादवले बिना कुनै जनप्रतिनिधिको रोहबरमा ताला फोडेर कार्यालयका सामानहरू हिनामिना गरेको आरोप लगाएका छन् ।
तालाबन्दी गरेको १५ दिन बितेपनि सहमतिमा नआई गत आइतबार प्रमुख प्रशासकीय अधिकृत यादवले स्थानीय प्रशासनको रोहबरमा आफूहरूलाई कुनै जानकारी नै नदिई उल्टै ताला फोडेको वडाध्यक्ष यादवको गुनासो छ ।
नेकपा एमालेबाट निर्वाचित वडा नम्बर–१ का वडाध्यक्ष दिलिप यादव, वडा नम्बर–२ का वडाध्यक्ष लालजी साह, वडा ५ का वडाध्यक्ष दुखरण यादव, वडा नम्बर–६ का वडाध्यक्ष महाविर साह, वडा नम्बर–७ का वडाध्यक्ष गंगा साहलगायत ६ जना कार्यपालिका सदस्य र ८ जना वडा सदस्यहरूसहित १९ जना जनप्रतिनिधिहरु धर्नामा बसेका छन् ।