एसपी रिपोर्टर
जनकपुरधाम, बैशाख १३ : धनुषाको शहिदनगर नगरपालिकाका प्रमुख उदय कुमार बरबरिया (यादव) ले नगरभित्रको दीर्घ रोगीहरुका लागि चाहिने औषधी नगरपालिकाले नै ल्याइदिने बताएका छन् । सरकारले कोरोना सँक्रमण रोक्नको लागि लगाएको लकडाउनमा परी दीर्घ रोगीहरु जस्तै टिबी (क्षयरोग), क्यान्सर, दम्मा, ब्लड प्रेसर, मधुमेह (चिनीरोग) लगायतका रोगीहरुको लागि नगरपालिकाले नै औषधी व्यवस्थापन गर्ने बताएका हुन ।
लकडाउनका कारण सदरमुकामसम्म जान नपाएर अत्यावयश्क औषधीको अभावमा स्वास्थ्य अवस्था झन खराव हुने भन्दै मेयर बरबरियाले नगरपालिकाले उनीहरुको तथ्याँक सँकलन गरी औषधी ल्याइदिने बताएका छन् । लकडाउनको पालना गरे मात्र कोरोनाको सँक्रमण रोकथाम गर्न मदत पुग्ने तर लकडाउनमा पनि अति आवश्यक औषधी एकदमै जरुरी रहेको र सजिलै उपलब्ध हुने नभएकाले नगरभित्रका त्यस्ता रोगीहरुलाई सहयोग गर्ने दायित्व समेत आफनो रहेको प्रमुख बरबरियाको भनाई छ । केहि औषधीहरु जनकपुरमा नभेटाए काठमान्डौंसम्म जाने बाध्यता रहेको तर सो काम गर्न ग्रामिण जनता असमर्थ रहेकाले समेत उनीहरुको औषधी नगरपालिकाबाट ल्याइदिने निर्णय गरिएको उनको भनाई छ ।
नगरभित्रका ती दीर्घरोगीहरुले नजिकको स्वास्थ्य सँस्थामा गएर आफूलाई चाहिने औषधीको विवरण लेखाउनुपर्ने बताउँदै तथ्याँक सँकलनपछि एकैपटक औषधी ल्याइने बताए । यसको लागि स्वास्थ्य सँस्थाका प्रमुख तथा कर्मचारीहरुलाई समेत तथ्याँक सँकलन तीव्र गतिमा गर्न निर्देशन दिएको बताए । त्यसको लागि तथ्याँक सँकलन गर्न नगरपालिकाको वडा नं. १ देखि ९ सम्म स्वास्थ्य स्वयंसेविका र सूचना मार्फत नगरवासीलाई जानकारी गराइएको छ ।
उनले नगरभरिका यस्ता असमान्य रोगीहरुको औषधी नपाउने अवस्था सृजना भएपछि नगरपालिकाको कोषबाट औषधी ल्याएर वितरण गर्ने बताए । दीर्घ रोगीहरुले मूल्य तिरेर पनि अहिलेको समयमा औषधी पाउन कठिन भएपछि नगरपालिकाले निःशुल्क रुपमा औषधी वितरण गर्ने निर्णय गरेको बताए ।
..
