एसपी रिपोर्टर
जनकपुरधाम, भदौ ३१ : प्रत्येक वर्ष जस्तै विजयादशमी, दिपावली र छठ पर्वको अवसरमा आयोजना हुने सस्तो बजारको सम्बन्धमा छलफल भएको छ । बजारको व्यवस्थापन समितिका अध्यक्ष समेत रहने गरेको धनुषाको प्रमुख जिल्ला अधिकारीको अध्यक्षतामा जनकपुरधाम उद्योग बाणिज्य संघको सभाहलमा भएको छलफलमा सहभागिहरुले सस्ता बजार नाम भएपनि सो बजार सस्तो अव नरहेको बताउदै ग्राहकलाई सहुलियतका लागि सबै पक्षत्र प्रयत्नरत हुनुपर्ने बताएका छन् ।
सिडिओ सुरेन्द्र पौडेलले बजारमा ग्राहक ठग्ने कुनै पनि काम गर्न नहुने बताए । पौडेलले असोज १ गते देखि धनुषामा चाडपर्व केन्द्रित विशेष सुरक्षा योजना लागु हुने समेत बताएका छन् । चाडपर्वका बेला हुने असुरक्षालाई मध्येनजरगर्दै असोज १ गते देखि सुरक्षा संवेदनशिलता बढने भन्दै त्यसका लागि सुरक्षा योजना बनाईको उनले बताए ।
जनकपुरधाम उपमहानगरपालिकाका प्रमुख मनोज कुमार साहले यो बजार भन्दा पनि विशेष प्रदर्शनी रहेकाले स्थानिय उत्पादन, बजार पर्वद्वनका लागि अवसरको रुपमा सदुपयोग गर्नुपर्ने बताए । जनकपुरधाम उद्योग बाणिज्य संघका अध्यक्ष तथा बजार व्यवस्थापन समितिका सदस्य सचिव जितेन्द्र महासेठले असोज २ देखि ६ गते सम्म बजारको स्टल बुक गर्न सकिने बताए । उनले पाकेटमार सहितका जोखिमहरुबाट सावधान रहन ग्राहकलाई आग्रह गरेका छन भने सुरक्षा व्यवस्थाका लागि सुरक्षा निकायलाई आग्रह गरेका छन् ।
कार्यक्रममा सुरक्षा निकायका प्रमुखहरु, उद्योगी, व्यवसायी, पत्रकार सहित बजार, उपभोक्ता सम्बन्धित संघ संस्थाका प्रतिनिधीहरुको उपस्थिती थियो ।
