एसपी रिपोर्टर
जनकपुरधाम, भदौ ११ : मिटरब्याजीको समस्या देश भरिमै फैलिएको देखिएपनि मधेश प्रदेशमा विकराल रुपमा रहेको तथ्याङ्कले देखाएको छ । ऋण दिएर सम्पुर्ण सम्पतीनै हडप्ने फोहरी खेल विरुद्व परेको कुल उजुरी मध्ये मधेश प्रदेशमा मात्र ६९ प्रतिशत देखिएको छ ।
ऋण दिएर सम्पुर्ण सम्पतीनै हडप्ने मिटरब्याजीको समस्या मधेश प्रदेशमा विकराल रुपमा रहेको तथ्याङ्कले देखाएको छ । नेपाल सरकारले मिटर ब्याजबाट पिडितहरुलाई उनीहरु संग रहेको समस्या विरुद्व भदौ पाँच सम्म जिल्ला प्रशासन कार्यालयमा उजुरी दिन समय सिमा तोकेकोमा भदौ पाँचगते सम्म कुल १९ सय ३७ उजुरी परेको छ ।
भदौ पाँच गते सम्म परेको कुल १९ सय ३७ उजुरी मध्ये मधेश प्रदेशबाटै मात्र ६९ प्रतिशत उजुरी परेको मिटरब्याजी अपराध नियन्त्रण सिफारिस कार्यदलका संयोजक एवं गृहमन्त्री मन्त्रालयका सहसचिव डा. भिष्म कुमार भुसालले जनाएको छ । उजुरी दिने समय सिमा भदौ ५ गते सम्म तोकिएको भएपनि उजुरी अझै निरन्तर आइरहेको उनले बताए ।
उनका अनुसार जिल्लागत आधारमा हेर्दा मधेश प्रदेशको सर्लाही जिल्लामा मात्र ४ सय ३७ उजुरी परेको छ भने अन्य जिल्लाहरुमा पनि औसतमा २ सय ५० वटा उजुरीहरु परेको छ । उनले मिटरब्याजी समस्या एकदमै गम्भिर पाइएको बताए । डा. भुसालकै अध्यक्षतामा शनिवार जनकपुरधाममा भएको मिटरब्याज सम्बन्धी अन्तरक्रिया तथा छलफल कार्यक्रममा पालिका प्रमुखहरुले वडा र पालिका स्तरबाटै समस्या पहिचान गरि समाधान खोज्नुपर्ने बताए ।
मुखियापट्टी मुसहरनिया गाँउपालिकाका अध्यक्ष जय कुमार यादवले आफु पालिकामा कागज लेख्ने लेखन्दास देवान्जीहरुलाई पक्रेर ल्याउने र सबै समस्याको पहिचान गर्न तयार रहेको बताए भने जनकपुरधामका मेयर मनोज कुमार साहले उहिलेका साहुमहाजनहरु सहयोगी भावनाका हिसावले ऋण दिने गरेकोमा अहिले बइमानहरु देखिएको बताए ।
उनले ऋणिहरु पनि पैसा दिने बेलामा बइमानी गर्ने गरेको बताए । कार्यक्रममा धनुषाधाम नगरपालिकाका मेयर बालेश्वर मण्डल, धनुषाका प्रमुख जिल्ला अधिकारी सुरेन्द्र पौडेल, प्रहरी प्रमुख सहित मिटरब्याज पिडितहरुको समेत उपस्थिती थियो ।
