एसपी रिपोर्टर
जनकपुरधाम, भदौ ८ :
नेकपा एमालेका केन्द्रीय सचिव रघुवीर महासेठले गठबन्धनको आडमा अस्तित्व जोगाउने प्रयासमा लागेका नेकपा एकिकृत समाजवादी, नेकपा माओवादी र मधेशवादी दलको पतन हुने बताएका छन् ।
उनले बुधबार धनुषाको ढल्केवरमा नेकपा एमाले मिथिला नगरपालिका कार्यसमितिले आयोजना गरेको अगुवा कार्यकर्ता भेला एवं हरितालिका तीज, जितिया, चौरचन पर्वको शुभकामना आदानप्रदान कार्यक्रमलाई सम्बोधन गर्दै आउँदो मंसीर ४ गते हुने प्रतिनिधिसभा र प्रदेशसभा सदस्यको चुनावपछि एकिकृत समाजवादी, माओवादी र मधेशवादी दलको विलय हुने जनाए ।
स्थानीय तहको चुनावपछि नेकपा एमाले पार्टीलाई दिउँसै टर्च बालेर खोज्नुपर्छ भन्ने माधव नेपालले आज उसैले नेतृत्व गरेको पार्टी एकिकृत समाजवादी पार्टीलाई टर्च लिएर खोज्ने दिन आइसकेको र अबका केही महिनापछि खोज्दा भेटिने होइन भेट्दै नभेट्ने दिन आइरहेको नेकपा एमालेका मधेश प्रदेश इन्चार्ज तथा पूर्वमन्त्री समेत रहेका महासेठले भने ।
धनुषाबाट माधव नेपालको पार्टी अहिले नै समाप्त भइसकेको भन्दै र कतिपय नेता कार्यकर्ता प्रत्यक्षरुपमा त कतिपय नेता कार्यकर्ता भित्रभित्रै नेकपा एमालेमा प्रवेश गरिसकेको दावी उनले गरे ।
चुनावपछि माओवादीको पनि हैसियत समाप्त हुन्छ । जनतालाई दिग्भ्रममा पारेर मधेश प्रदेशमा ठूलो राजनीतिक दल बनेका मधेशवादी पार्टी मधेशबाटै समाप्त हुन गइरहेको छ । आउँदो चुनावबाट मधेश प्रदेशको ३२ प्रदेशसभा सदस्य सिटमध्ये १६ वटामा नेकपा एमालेको जित सुनिश्चिछ, उनले भने ।
पूर्वमन्त्री महासेठले नागरिकताको विषयमा बोल्दै गठबन्धनको सरकारले नागरिकताको विषयलाई लिएर नेकपा एमाले पार्टीलाई अनायासै बदनाम गर्न खोजेको आरोप लगाए । उनले भने, नागरिकताविहिन भएर कुनै नेपाली बस्नु नपरोस् भन्ने धारणा आफ्नो र आफ्नो पार्टीको भएको प्रस्ट पारे ।
पूर्वमन्त्री महासेठले भने, झण्डै साढे तीन वर्षअगाडि नेकपा एमाले नेतृत्वको सरकारले प्रतिनिधिसभामा पठाएकोे नागरिकता विधेयक नेपाली कांग्रेस, माओवादी र तिनै मधेशवादी दलले पारित हुन नदिएको हो । जनता एमालेको पक्षमा लागेको देखेर तिरमिरिएका गठबन्धनको सरकारले नेकपा एमालेसँग नसक्ने भएपछि नागरिकताको विषयलाई लिएर भोटको राजनीति गरेको सुरु गरेको हो ।
मिथिला नगरपालिकाको ढल्केवरमा बन्न लागेको ट्रमा सेन्टर पनि आफ्नै पहलमा ल्याएको हुँ । त्यस विषयमा पनि विपक्षी दलका स्थानीय नेताहरुले मिथ्यामा बदनाम गर्न खोज्यो । आफूलाई आजीवन मेयर ठान्ने तत्कालिन नगर प्रमुख र विपक्षी दलका कारण निर्माण कार्यमा अलि ढिलाई भएको हो । तर ट्रमा सेन्टर ढल्केवरमै बनोस भन्ने चाहना आफ्नो पनि भएको पूर्वमन्त्री महासेठ स्पष्ट पारे ।
नेकपा एमाले मिथिला नगरपालिका कार्यसमितिले आयोजना गरेको अगुवा कार्यकर्ता भेला एवं हरितालिका तीज, जितिया र चौरचन पर्वको शुभकामना आदानप्रदान कार्यक्रम नेकपा एमाले पोल्टीब्युरो सदस्य तथा पूर्वमन्त्री जुली महतो तीज गीतमा कार्यकर्तासँगै छमछम नाचेर रमाइलो गरिन् । सँगसँगै नाचेको देखेर महिला कार्यकर्ता निकै हौसिएको देखिएको थियो ।
