एसपी रिपोर्टर
जनकपुरधाम, भदौ ६ : महोत्तरीका मिटरब्याजी अनिरुद्ध साह पक्राउ परेका छन् । तराई मधेशमा ऋण दिएर अवैध रुपमा अनावश्यक रुपमा नगद मात्र होइन जग्गा जमिन र भएभरका सम्पतीनै हडप्ने घटनाहरुले मिटर ब्याजी समस्या बाहिर आएको हो ।
शनिबार राति आफ्नै घरबाट पक्राउ परेका महोत्तरीका मिटरब्याजी अनिरुद्ध साह लाई म्याद थपका लागि जिल्ला अदालत लग्ने तयारी भइरहेको महोत्तरीका एसपी कृष्ण पंगेनीले बताए । दर्जनौँ व्यक्तिले उजुरी दिएपछि उनी फरार रहेका थिए । अनिरुद्ध माथि चर्को ब्याजमा ऋण लगानी तथा ठगी जालसाजी गरी दर्जनौँ व्यक्तिको सम्पत्ति हडपेको आरोप छ ।
उनले गैरकानुनी रूपमा चर्को ब्याजदरमा महोत्तरी, धनुषा, सर्लाही लगायतका विभिन्न जिल्लाका गरिब तथा विपन्नलाई ठगी गरेको आरोप छ । मिटर ब्याजीको समस्या लिएर अहिले धनुषा जिल्ला प्रशासनमा पनि दैनिक जसो उजुरी लिएर पडितहरु पुग्ने गरेका छन् ।
जनकपुरधाममा लेखापढी व्यवसायकोमा उजुरी लिख्न पुगेकी धनुषाको धनुषाधामकी तेतरी देवी मुखिया आफुले स्थानिय गोल्हो देवी संग २ लाख रुपैया ऋण लिँदा प्रति महिना १५ हजार लिने गरेको र पाँच लाखको कागज बनाएर आफु माथी मुद्दा दायर गरिदिएपछि समस्या परेको बताइन् ।
३ लाख ८० हजार ऋण लिएकी धनुषाकी सिकयाहाकी गिता देवी संग स्थानिय सरिता देवीले २ लाख ऋण दिएवापत दुई महिनाको फरकमा ५५ हजार रुपैया लिने गर्थिन तर उनले अव दिन नसक्ने भनेपछि थप ३ लाख रुपैया मागिरहेको बताइन, ।
सिकयाहाकै आशा देवीले १ लाख ८० हजार ऋण लिएकोमा उनलाई ब्याज वापत ३० हजारको महिना असुल गरियो । धनुषाको हँसपुर नगरपालिकामा पनि यस्तै समस्याहरुको चाँङ्ग छ । स्थानिय सतदेव लाल मुखियाको जमिन नै साहुले अर्का व्यक्तिलाई बेचिसकेका रहेछन् ।
सोहि ठाँउ बस्ने बयोबृद्व मंगल मुखिया माथी समेत साहुले मुद्दा दिएर जमिन रोक्का गरिदिएपछि उनी समस्यामा छन् । यस्ता अनेकन समस्या लिएर मिटर ब्याज पिडितहरु दैनिक उजुरी लेखिदिन भनि आउने गरेको लेखापढी व्यवसायीहरु बताउछन् । लेखापढी व्यवसायी तथा महिला अगुवा रञ्जना झाको अनुसार घरेलु हिंसा भन्दा पनि मिटर ब्याजीको समस्या बढदै गएको बताउदै महिलाहरु यस्ता समस्यामा धेरै पर्ने गरेको बताउछिन ।
उनले दैनिक पाँच देखि दश जना पिडितहरु समस्याका साथ आउने गरेको बताईन । यस्ता समस्या मधेश प्रदेशको आठवटै जिल्लामा व्यापत छ । पिडितहरु बालबच्चा सहित जनकपुरधाममा वर्षामा रुझदै आन्दोलन गर्न बाध्य भएका छन् । घरका अभिभावक विदेशिने गरेको र घरका महिलाहरु यस समस्या र झन्झटमा बढि पर्ने गरेको देखिन्छ । कानुनको जालमा फँसाएर ब्याजको नाउँमा अनाधिकृत रुपमा असुलिने रकम र सम्पतीको घटनाहरु अहिले धमाधम वाहिर आउन थालेको छ ।
