एसपी रिपोर्टर
जनकपुरधाम, भदौ ५ : मधेश माथी जबरजस्ती लाधिएको वर्तमान संविधानमा भाषा सहित धेरै त्रुटी छ भन्दै पार्टीको ह्वीप विपरित हस्ताक्षर नगर्ने एक मात्र कांग्रेसी सांसद थिए प्रदिप गिरी । स्वामी आनन्द अरुणका अनुसार गिरी कुनै पनि कम्युनिष्ट भन्दा बढि माक्र्सवादको अध्यन्न गरेका नेता थिए ।
गिरी कसैको केहि नबिगारेर बिदा भएको उनले बताए । गिरी सर्वप्रिय भएर अवसान भएको उनको कथन छ । मेडिसिटी अस्पताल प्राङ्गणमा गिरिलाई श्रद्धाञ्जली व्यक्त गरेपछि स्वामी अरुणले प्रदीप गिरिले कसैको केही नबिगारी गएको बताए ।
‘उहाँ सर्वप्रिय हुनुहुन्थ्यो । सबैभन्दा राम्रो कसैको बिगारेर जानुभएन । जति सक्नुभयो गाउँमा बनाउनुभयो’ उनले भने, ‘रिस बोकेर जानुभएको छैन । यो उहाँको सफलता हो ।’
उनी कांग्रेसको नेता भए पनि कम्युनिष्टले पनि त्यतिकै आदर र श्रद्धा गर्ने गरेको बताउँदै उनले वर्तमान राजनीतिमा यस्ता व्यक्ति भेटाउन नसकिने बताए ।
‘कसैले विरोध गर्दैन । कुनै पार्टीको मान्छे उहाँको शत्रु छैन । यस्तो मान्छे कहाँ भेटाउन सकिन्छ । उहाँ सर्वप्रिय हुनुहुन्थ्यो,’ उनले थपे । गिरिले कुनै पनि कम्युनिष्टभन्दा बढी मार्क्सवादको अध्ययन गरेको उनले बताए ।
मधेश आन्दोलनबाट जन्मिएका नेता भन्दा ठुला मधेशवादी
एसपी खवरसंगको कुराकानीमा वरिष्ठ पत्रकार चन्द्रकिशोर झाले स्व. गिरी प्रति उच्च सम्मान अर्पण गर्दै एक वाक्यमा भने, ‘उहाँ मधेश आन्दोलनबाट जन्मेका मधेशवादी भनिने नेताहरु भन्दा पनि मधेश प्रति बढी ईमान्दार नेता हुनुहुन्थ्यो ।’
नेपालको राजनितिले एक कुशल अभिभावक गुमाएको उनको भनाई थियो । उहाँलाई श्रद्धाञ्जली अर्पण गर्न पुर्व राष्ट्रपती डा. रामवरण यादव, प्रधानमन्त्री शेरबहादुर देउवा सहित कांग्रेसका शिर्षनेताहरु, माओवादी केन्द्रका अध्यक्ष प्रचण्ड सहितका पुगेका थिए ।
साथै राष्ट्रपति विद्यादेवी भण्डारी, उपराष्ट्रपती नन्द बहादुर पुन, एमाले अध्यक्ष तथा पुर्व प्रधानमन्त्री केपि शर्मा ओली सहितकाले समेत गिरीको निधन प्रति दु:ख व्यक्त गर्दै शोक व्यतब्य जारी गरेका छन् ।
