नागरिकताको विषयमा नेपाली कांग्रेस सहितका दल नेकपा एमाले माथि झुठा आरोप लगाउदै: महासेठ

एसपी रिपोर्टर
जनकपुरधाम, भदौ ३ :  नेकपा एमालेका सचिव रघुवीर महासेठले नागरिकताको विषयलाई लिएर नेपाली कांग्रेस , मधेशकेन्द्रित सहितका दलहरूले नेकपा एमालेमाथि झुठा आरोप लगाउने गरेको दाबी गर्नुभएको छ ।
धनुषाको महेन्द्रनगरमा शुक्रबार क्षेत्र नम्बर ४ पार्टी कार्यालयले गरेको सभामा एमाले सचिव महासेठले यस्तो बताउनुभएको हो । उहाँले ओली नेतृत्वको सरकारका बेला जन्मसिद्ध नागरिकका सन्तानलाई नागरिकता दिने परिपत्र सीडीयोहरूलाई गर्दा नेपाली कांग्रेस , मधेशकेन्द्रित सहितका दलहरूले नै अदालतमा मुद्दा दायर गर्न लगाएको आरोप लगाउनुभएको हो। सीडीयोहरूलाई गरेको परिपत्रअनुसार नागरिकता दिइए एमालेले यसको जस पाएर बलियो हुने देखेर वकिलहरूमार्फत् मुद्दा चलाउन लगाएर यो निर्णय बदर गराएको उहाँको आरोप छ ।
मधेशकेन्द्रित दलहरूले सरकारमा हुँदा नागरिकताको विषय नउठाउने र सरकारबाट हट्दा मात्र नागरिकताको मुद्दा उठाउने गरेकोसमेत सचिव महासेठले आरोप लगाउनुभयो । महासेठले आसन्न प्रतिनिधिसभा र प्रदेशसभा निर्वाचनमा नेकपा एमालेले बहुमत ल्याउने पनि दाबी गर्नुभयो । मधेश प्रदेशमा एमालेले बहुमत ल्याएर सरकार निर्माण गर्नेसमेत उहाँको दाबी छ ।
सचिव महासेठले नेकपा एमाले मधेश विरोध नरहेको पनि दाबी गर्नुभयो । ओली नेतृत्वको सरकारका पालामा मधेशमा धेरै विकास निर्माणका काम भएकोसमेत उहाँको दाबी थियो । सभामा एमालेकी नेतृ जुली महतो, महेन्द्र यादव, शिवशंकर साह हिरालगायत नेता तथा कार्यकर्ता सहभागी भएका थिए।