एसपी रिपोर्टर
जनकपुरधाम, जेठ २६ : संघीय मामिला तथा सामान्य प्रशासन मन्त्री राजेन्द्र श्रेष्ठलाई पार्टीकै नेताले हातपात गरेका छन् । जनता समाजवादी पार्टी जसपाका प्रभावशाली नेता समेत रहेका श्रेष्ठलाई सोही पार्टीका मधेश प्रदेश अध्यक्ष रामबाबु यादवले हातपात गरेका हुन् ।
आफ्नो क्षेत्रमा बजेट नपारिदिएको भन्दै यादवले सिंहदरबारस्थित मन्त्रीकै कार्यकक्षमा आएर हातपात गरेको स्रोतले दाबी गर्यो । यादव बारा क्षेत्र नम्बर ३ बाट प्रत्यक्ष निर्वाचित सांसद हुन् । यसबारे प्रतिक्रिया माग्दा यादवले चर्काचर्की मात्र परेको बताए ।
‘मेरो निर्वाचन क्षेत्रको योजना पेश गर्दा पनि बजेटमा नआएपछि किन नआएको भनेर प्रश्न गर्न जाँदा चर्काचर्की भएको हो,’ यादवले भने । स्रोतका अनुसार यादवले हातपात गरेपछि पीएसओ नै आएर बचाउनुपरेको थियो । त्यसपछि प्रहरी समेत बोलाइएको स्रोतको दाबी छ । घटनास्थलमै रहेका निलम्बित सांसद हरिनारायण रौनियारले पनि तनाव भएको स्वीकारे । तर, उनले विस्तृतमा खुलाउन चाहेनन् । नेता यादवले मधेशको मतले मन्त्ती बन्ने अनि मधेशलाई बजेट र योजना नदिने ? भन्दै जाइ लागेको बताइन्छ ।
लोकान्तरडटकमको सहयोगमा