एसपी रिपोर्टर
जनकपुरधाम, चैत १७ : आज चैती छठ, तर बाध्यता यस वर्षको छठ घरमै मनाउनु पर्ने भएको छ । वर्षमा दुई पटक हुने छठ पर्व मुख्यतः पोखरी, नदी, तलाउ र सरोबरको किनारामा मनाइने भएपनि प्रहरीले कोरोनावाट बच्नका लागि यसवर्षको चैती छठ घरमै मनाउन अपिल गरेपछि ब्रतालुहरु इतिहाँसमै पहिलो पटक घरमै छठ पर्व मनाउनु पर्ने बाध्यात्मक स्थितीको सृजना भएको छ । मुख्यतः तराई मधेश र मिथिलामा मनाइने चैती छठ घरमै मनाउन जिल्ला प्रहरी कार्यालयहरु अपिल सहितको निर्देशन जारी गरेको छ । साथै प्रहरीले यस्ले ब्रतालुमा पर्ने असर र पिडाका लागि क्षमा समेत मागेको छ ।
जिल्ला प्रहरी कार्यालय धनुषाका प्रवक्ता नायव प्रहरी उपरिक्षक रामेश्वर कार्कीले विश्वकै मानवजातीका लागि यो संकट नयाँ अनुभव रहेकाले विभिन्न बाध्यात्मक स्थितीको अवस्था सृजना भइरहेको बताए । छठमा ब्रतालु र तिनका परिवारजन मात्र नभई दर्शनका लागि समाजकै उपस्थिती एकठाँउमा हुने भएकाले कारोना संक्रमणको सवालमा जोखिम हुने भएकाले घरमै पर्व मनाउनुको विकल्प नरहेको प्रहरीको भनाई छ । ब्रतालुहरुका अनुसार घरमै स्नान गरि कठौता सहितका ठुला भाँडामा पानी जम्मा गरि आज अस्ताउँदो सुर्यलाई अर्घ दिइने छ भने भोली विहान उदाउँदो सुर्यलाई अर्घ दिई छठी मइया र सुर्य देवताको पुजा हुने चैती छठ मनाइने तयारी छ ।
