एसपी रिपोर्टर
जनकपुरधाम, जेठ ६ : जनकपुरधाम सहित यस क्षेत्रको मौसममा आमुल परिवर्तण भएको छ । सोमवार सम्म गर्मी र चर्को घाम देखिने यस क्षेत्रमा सोमवार राती देखिनै मौसम बदली भई आज विहान देखि वर्षा सुरु भएको छ ।
सुरुमा मौसम बदली भई कतै उज्जयालो त कतै अन्धयारो देखिएको जनकपुरधाममा पछि वर्षा सुरु भएको हो । तस्वीरमा प्रस्तुत छ मौसम परिवर्तणको दृश्य । मौसम विज्ञान विभागले समेत तिन दिन सम्म व्यापक मौसममा बदली हुने र वर्षाका साथै हिमपात सम्मको अनुमान गरेको छ । वर्षा भएपछि भने मौसममा सुधार देखिन्छ ।
यस्तो छ कारण र प्रभाव
बंगालको खाडीमा विकसित शक्तिशाली चक्रवात ‘अम्पुन’को नेपालमा अप्रत्यक्ष प्रभाव परेको मौसमविदले बताएका छन् । स्थानीय वायु र अम्पुनको अप्रत्यक्ष प्रभावका कारण काठमाडौं उपत्यकासहित देशका अधिकांश स्थानमा बदली भएको छ । काठमाडौंका केही स्थानमा मंगलबार बिहान हल्का वर्षा पनि भएको छ ।
‘अम्पुन’ चक्रवातको वेग बढ्दै गएको छ । त्यसैले मौसमविदहरुले त्यसलाई ‘सुपर साइक्लोन’ भनेका छन् । हाल यो भारतको ओडिसा हुँदै उत्तरतर्फ सर्दै गएको छ ।यसको प्रभावले मंगलबारबाट नेपालको पूर्वी भूभाग प्रभावित हुने छ । पूर्वी नेपालका जिल्लामा हुरी, बतास र चट्याङससहित वर्षा हुने मौसमविद प्रतिभा मानन्धरले जानकारी दिइन् । त्यसको प्रभाव मध्य नेपालका केही जिल्लामा पनि पर्ने तर पश्चिम नेपालमा असर नगर्ने मौसमविद मानन्धरको भनाइ छ ।
त्यसबाट काठमाडौं उपत्यकामा पनि अप्रत्यक्ष प्रभाव नै रहने र चट्याङसहित हल्का वर्षा हुने पूर्वानुमान गरिएको छ । नेपालमा अम्पुनको अप्रत्यक्ष प्रभाव देखिसकेको छ । धेरैजसो बंगालको खाडीमा बन्ने चक्रवातले नेपालमा खासै असर पार्दैन । यदि असर परिहाल्यो भने पनि पूर्वी नेपालमा मात्र पार्ने मौसमविद मानन्धर बताउँछिन् । अम्पुन चक्रवातका कारण मंगलबारबाट विस्तारै पानी पर्न सुरु हुने र यसको प्रभाव दुई–तीन दिनसम्म नेपालमा देखिने मौसम विज्ञान विभागको अनुमान छ ।
चक्रवातले जमिनमा छोइसकेपछि काम गर्न छोड्छ । जबसम्म अम्पुनले जमिन छुँदैन, तबसम्म वर्षाको सम्भावना हुने मौसमविदहरु बताउँछन् । अम्पुनले भारत र बंगलादेशमा बढी क्षति पुर्याउने अनुमान गरिएको छ । कोरोना भाइरसविरुद्ध लडिरहेको बेला शक्तिशाली चक्रवातको आपत आइलागेको सरकारका अधिकारीहरुले बताएका छन् ।
