एसपी रिपोर्टर
काठमाण्डौं, बैशाख १५ : २९ वर्ष प्रहरी सेवामा कार्यरत पुर्व प्र्रहरी प्रशासक रमेश खरेलले सांसद अपहरण विरुद्वको मुद्दा दर्ता नगर्नु प्रहरी संगठनकै लागि दुःखद रहेको बताएका छन् । प्रहरी सेवामा कार्यरत रहँदा डिआइजी सम्म भएका र आइजिपीको रेसमा राजनितिको सिकार भएका खरेलले महोतरी देखि सिन्धुली, कार्भे हुदै काठमाण्डौ सम्म सांसद अपहरणको घटना सम्बन्धित रहेको बताउदै जहाँ पनि उजुरी दर्ता गर्न मिल्ने दावी गरेका छन् । यस घटनाले प्रहरी संगठनको मात्र नभई त्यसमा सेवा दिएर अवकास पाएका सवैको शिर निहुरेको उनको कथन छ ।
हेडक्वाटर दबाबमा
एता पूर्वस्वास्थ्य राज्यमन्त्री समेत रहेका जनता समाजवादी पार्टी (जसपा)का सांसद डा. सुरेन्द्र यादवको अपहरण प्रकरणमा मुछिएकाहरु विरुद्धको किटानी जाहेरी दर्ता गर्न प्रहरी हेडक्वाटरले निर्देशन दिएको छ । प्रहरी प्रवक्ता डिआइजी निरज शाहीले कानुन अनुसार जाहेरी दर्ता गर्न निर्देशन दिएको जानकारी दिदै दर्ता गर्न नमाने त्यसको पनि कानुनी बाटो खुल्ला रहेको बताए ।
सत्तारुढ नेकपाका सांसदद्वय महेश बस्नेत, किसन श्रेष्ठ र पूर्वप्रहरी महानिरीक्षक सर्वेन्द्र खनालले जबर्जस्ती बुधबार राति सांसद यादवलाई काठमाडौं ल्याएकोे घटनालाई अपहरण भन्दै आइतबार प्रहरी परिसर टेकुले सांसद् यादवको अपहरण प्रकरणमा किटानी जाहेरी लिन मानेको थिएन । सांसद यादवलाई अपहरण गरिएको भन्दै जसपाका नेताहरू प्रहरीमा मुद्दा दर्ता गराउन प्रहरी परिसर टेकु पुगेका थिए । तर प्रहरीले जाहेरी लिन नमानेको र महोत्तरी जान भनेपछि प्रहरी र नेताहरूबीच चर्काचर्की भएको थियो । प्रहरीले जाहेरी लिन नमानेपछि सामाजिक सञ्जालमा प्रहरीको तिव्र आलोचना भइरहेको छ ।
