एसपी रिपोर्टर
जनकपुरधाम, बैशाख ९ : राजपा नेपालले सोमवार एकाएक प्रधानमन्त्री केपि शर्मा ओलीको दबाबमा मन्त्री परिषदद्वारा सिफारिस र राष्ट्रपतिद्वारा जारि गरिएको अध्यादेश प्रति गम्भिर ध्यानाकर्षण भएको जनाएको छ । महामारीका बेला सरकारले अध्यादेश ल्याउदा राजनिति नै कंलकित भएको राजपाको निश्कर्ष छ । अध्यादेशलाई बेमौसमी बाजा समेत भनेको राजपाको संयोजक सरतसिंह भण्डारीद्वारा जारी बिज्ञप्तीमा भनिएको छ, ‘ अध्यादेश मुलुकलाई अस्थिरिता तर्फ धकेल्ने षडयन्त्र हो, संविधानको मर्म विपरित सर्वसत्तावाद लाद्यने कुचेष्टा हो ।’ राजपाले अध्यादेशले पार्टीलाई कुनै असर नपर्ने भन्दै कोरोना महामारीवाट बच्न र नियन्त्रण गर्नमा केन्द्रित हुन र यस्ता लगत स्टन्टको पछि नलाग्न नेता कार्यक्रतालाई आग्रह समेत गरेको छ ।
यस्तो छ राजपा नेपालको विज्ञप्ती ।
समाजवादी पार्टीको पनि विज्ञप्ती ।
समाजवादी पार्टीले सरकारले सोमबार ल्याएको राजनीतिक दलसम्बन्धी र संवैधानिक परिषदसम्बन्धी अध्यादेश राजनीतिक पार्टी फुटाउने षड्यन्त्र गर्न ल्याएको आरोप लगाएको छ । मंगलबार अध्यक्ष उपेन्द्र यादवले विज्ञप्ति जारी गरी राजनीतिक पार्टीहरुलाई सत्ता–शक्ति, पद र आर्थिक चलखेल गरी फुटाउने षड्यन्त्र गर्न अध्यादेश ल्याइएको टिप्पणी गरेका हुन् । ‘यसले मुलुकमा राजनीतिक अस्थिरता ल्याउने र लोकतन्त्रलाई समाप्त पारी देशलाई नै ठूलो दुर्घटना पार्ने यादवद्वारा जारी विज्ञप्तिमा उल्लखे छ ।
अध्यादेशले नेपाली जनताको ठूलो त्याग, संघर्ष र बलिदानबाट प्राप्त संघीयता, लोकतन्त्र, गणतन्त्र र समावेशीतालाई धरापमा पार्ने र सिंगो मुलुकलाई नै द्वन्द्व र अस्थिरतातर्फ धकेल्ने समाजवादी पार्टीले बताएको छ । ‘अध्यादेश लोकतन्त्र र संविधानको मर्म, भावनाका प्रतिकुल हुनुका साथै देश र जनताको हितविरुद्ध पनि छन् । यसलाई सरकारले फिर्ता लिनुपर्छ’ विज्ञप्तिमा भनिएको छ । कोरोना महामारीबाट जनताको जीवनको रक्षा गर्दै लोकतन्त्रको रक्षा र राष्ट्रिय हितका लागि सरकारी कदमको विरोध गर्न पनि समाजवादी पार्टीले आग्रह गरेको छ ।
सरकारले सोमबार राजनीतिक दलसम्बन्धी दोस्रो संशोधन अध्यादेश र संवैधानिक परिषदको काम कर्तव्य अधिकार र कार्य्विधिसम्बन्धी पहिलो संशोधन अध्यादेश ल्याएको थियो । राजनीतिक दलसम्बन्धी अध्यादेशले दल विभाजन गर्न पार्टीको केन्द्रीय समितिको ४० प्रतिशत वा संसदीय दलको ४० प्रतिशतमध्ये एउटा पुग्ने व्यवस्था गरेको छ ।
