एसपी रिपोर्टर
जनकपुरधाम, चैत ८ : जिल्ला प्रहरी कार्यालय धनुषाको टोलीले धनुषामा एक क्रसर डनलाई पक्राउ गरेको छ । जिल्ला प्रहरी कार्यालय धनुषा, जिल्ला प्रशासन कार्यालय धनुषा, जिल्ला समन्वय समिति र धनुषाको गणेशमान चारनाथ नगरपालिकाको सँयुक्त टोलीको अनुगमनको क्रममा एक क्रसर डनलाई पक्राउ गरिएको हो ।
गणेशमान चारनाथ नगरपालिका वडा नं. ६ स्थित सँचालनमा रहेको कमला कन्सट्रक्सनका सँचालक महादेव महतो (घेराभित्र) लाई पक्राउ गरिएको हो । सँयुक्त टोलीले उनलाई नविकरण नै नगरी क्रसर सँचालन गरेको भन्दै पक्राउ गरेको हो । नियमित रुपमा क्रसर सँचालन गर्दै कर छली गर्दै आएको तथा अवैद्य रुपमा उत्खनन समेत गरेको भन्दै उनलाई पक्राउ गरिएको हो । गणेशमान चारनाथ नगरपालिकाले समेत विभिन्न समयमा क्रसर बन्द तथा अधिकारिक बनाउ बारम्बार पत्र काटेपनि अटेरी गर्दै आएको थियो ।
जिल्ला समन्वय समिति धनुषाका अध्यक्ष रामदेव बनरैत यादवले अवैद्य रुपमा क्रसर सँचालन गरेको कारण उनलाई पक्राउ गरिएको बताए । उनले अवैद्य रुपमा नदीमा उत्खनन गरेकोले पक्राउ गरिएको बताए । यसअघि सँचालक महतोले आफुले क्रसर उद्योग बन्द गरिसकेको भनेर प्रशासनसँग झुठो बोल्दै लुकीछिपी सँचालन गर्दै आएको थियो । सरकारको कर छली सहित अवैद्य रुपमा सँचालित भएकोले तत्कालै कारवाही गरिने जनाइएको छ ।
बन्द गरिसकेको क्रसर धनुषाका प्रमुख जिल्ला अधिकारी कोषहरी निरौलको नेतृत्वमा गएको अनुमगन एवम् नीरिक्षण टोलीले क्रसर सँचालीत अवस्थामै भेटेपछि उनलाई पक्राउ गरिएको हो । पक्राउ परेका उनलाई जिल्ला प्रशासन कार्यालय धनुषामा आवश्यक अनुसन्धान गरिने छ । गत पुस २५ गते विहान धनुषाको मिथिला नगरपालिका वडा नं. ३ स्थित एक त्रसर डन तथा अवैद्य नदी उत्खननको विरोध गर्दा क्रसर डनहरुले स्थानिय दिलिप भनिने ओमप्रकाश महतोको हत्या गरेको थियो ।
फोटो स्रोत : नेपाल प्रहरी तथा घनश्याम मिश्र
