एसपी रिपोर्टर
जनकपुरधाम, भदौ ४ : रौतहटमा एक मन्दिरका पुजारीको गोली दागेर भएको हत्याको घटना प्रति विश्व हिन्दु परिषद नेपाल निन्दा गरेको छ । जिल्लाको माधव नारायण गाउँपालिका वडा नं. २ खेसहरिया स्थित श्री हनुमान मन्दिरको महन्थ पुजारी बाबा श्रीराम साहको गोलि हानी हत्या भएको घटनालाई परिषद नेपालले विज्ञप्ती जारी गर्दै निन्दनीय र अमानवीय भनेको छ ।
विज्ञप्तीमा भनिएको छ, ‘नेपालमा साधु सन्त समेत सुरक्षित हुन नसक्नु दुर्भाग्यपुर्ण छ ।’ घटना प्रती गम्भीर ध्यानाकर्षण भएको भन्दै अमानवीय घटनाको कडा शब्दमा निन्दा गर्दै हत्यामा संलग्न अपराधीलाई यथा शिघ्र खोजी कानुनी दायरामा ल्याएर कडा कारवाही गर्न जोडदार माग समेत गरेको छ । साथै मृतक महन्थलाइ शहिद घोषणा गर्न समेत सरकार संग मांग गरिएको छ ।
परिषद नेपालका राष्ट्रीय अध्यक्ष टीका बहादुर पहारी र महासचिव जितेन्द्र कुमार सिंहले संयुक्त हस्ताक्षरमा जारी गरेको बिज्ञप्तीमा हिन्दुको आस्था माथी निरन्तर आँच आउने हत्या हिंसा र आक्रमणको घटना बढनुले नेपालको फितलो सुरक्षा ब्यबस्थालाई प्रदर्शित गरेको उल्लेख गरिएको छ । मृतक साधुको मृत आत्माको चिर शान्तिको कामना गर्दै विज्ञप्तीका माध्यमले हार्दिक श्रद्धाञ्जली समेत अर्पण गरिएको छ ।
