एसपी रिपोर्टर
जनकपुरधाम, असार २१ : जनकपुरधाम उपमहानगरपालिका वडा नं. २१ कुर्थाकी ११ वर्षिय वालिका कञ्चनको हत्यामा संलग्न रहेको आंशका प्रहरीले करिव डेढ दर्जन व्यक्तिलाई पक्राउ गरि अनुसन्धान गरिरहेको छ । आफुलाई अघोरी बाबा भन्ने देखि सोधपुछको आधारमा करिव १९ जनालाई पक्राउ गरेर अनुसन्धान भइरहेको धनुषा प्रहरीको भनाई छ ।
जनकपुरधाम उपमहानगरपालिका वडा नं. २१ कुर्था बस्ने विनोद पजियारकी छोरी ११ वर्षिय कञ्चनको शव निर्वस्त्र अवस्थामा शुक्रबार बिहान साढे ११ बजेतिर स्थानीयले दुधमति नदीको छेउमै देखेका थिए । धान रोपाइँ गरिरहेका स्थानियले गत बुधवार भैसी चराउन गएर वेपता भएकी कञ्चनको शव दुर्गन्धीत भएपछि पता लगाउन सफल भएका थिए । नदीको पश्चिमपट्टी झाडीको तल नग्न अवस्थामा बालिकाको शव देखेपछि कञ्चनको बलात्कार पछि हत्या भएको आंशका गरिएको छ । सो घटनामा प्रह्रीले अहिले सम्म करिव १९ जनालाई पक्रेर अनुसन्धान गरिरहेको धनुषाका प्रहरी प्रबक्ता रामेश्वर कार्कीले बताए ।
कञ्चनकी आमा संगीतादेवी पजियारको परिवार तरकारी व्यवसाय गर्छन् । बुधबार बिहान संगीता आफ्ना जेठो दाई राजुसँगै धनुषाको ढल्केबजार पुगेर तरकारी किनेर झण्डै ११ बजे फर्किन् । घरको आर्थिक अवस्था कमजोर भएका कारण पति वनोद पजियार र १३ वर्षीय छोरा रोशन छिमेकको खेतमा मजदुरी गर्न बिहानै गएका थिए । कञ्चन काका महेन्द्र पजियारको घरमा खाना खाएर भैँसी चराउन गइन र त्यसपछि वेपता भएकी थिइन ।
विहिवार बिहान प्रहरीलाई कञ्चन वेपता भएको खवर गरिएको थियो । दुई छोरा पछि एक छोरी पाउन संगीताले भाकल गरेकी थिइन् । तर भगवानले दिएको छोरी कञ्चनलाई पापीहरुले कलिलै उमेरमा खोसे । कञ्चनको शव नग्न अवस्थामा झाडीमा फेला परेको हो । शवको प्रकृति हेर्दा कसैले बलात्कार गरेर हत्या गरेको हुन सक्ने प्रहरीको आशंका छ । घटनास्थल नजिकबाट प्रहरीले एउटा कम्बल बरामद गरेको छ । घटनामा संलग्न रहेको आशंकामा घटनास्थलभन्दा झण्डै डेढसय मिटर दक्षिण समसानघाटमा बस्ने एक अघोरीबाबा सहित १९ जनालाई प्रहरीले पक्राउ गरेको छ ।
करिब ४५ वर्षका ती अघोरीबाबा भारतबाट आएर झण्डै एक वर्षदेखि स्मसान घाटमा बस्दै आएको स्थानीयले बताएका छन् । उनले नशा समेत सेवा गर्ने गरेका छन् । स्थानीयका अनुसार घटनास्थल नजिकै रहेको आँप बगैँचामा लागु औषध सेवन गर्ने युवाहरुको समूह समेत आउने गरेको हुन्छ । लागु औषध सेवन गर्नेहरुले नै कञ्चनलाई त्यहाँबाट अपहरण गरी बलात्कार गरेर हत्या गरेको हुनसक्ने स्थानीयले अनुमान लगाएका छन् ।
