एसपी रिपोर्टर
काठमाण्डौं, जेठ ७ : आफुलाई एपिवान टेलिभिजनको पत्रकार भन्दै आइडी कार्ड देखाउने व्यक्ति चोरको आरोपमा पक्राउ परेका छन् । बिश्वव्यापी कोरोना भाईरस कोबिड १९ को महामारी अवस्थामा भएको लकडाउनको मौका छोपी रात तथा दिनको समयमा बिगत केही समय देखी काठमाडौं उपत्यकाभित्र रहेका बिभिन्न स्थानमा चोरीका घटनाहरु ह्ुन थालेपछि प्रहरीले कडाई गर्दा चोरीको सरसमानहरु सहित दुईजना पक्राउ परेका छन् ।
चोरीका घटनालाई नियन्त्रण गर्नाका लागि महाशाखा तथा महानगरिय प्रहरी बृत्त गौशालाबाट चोरी तथा लुटपाट घटना नियन्त्रण २०७७ अनुरुप खटिएको संयुक्त प्रहरी टोलीले गस्ती तथा निगरानी गर्ने क्रममा विभिन्न समयमा भएको चोरीको अनुसन्धान गर्दा सुनसरी इटहरी घर भई हाल धुम्वाराही बस्ने २१ वर्षिय आश्रय रिजाल हिमाल हम्मे भन्ने हिमाल रसाईली र बारा बडकी फुलवारी घर भई हाल ओमबहाल काठमाण्डौं बस्ने २८ विर्षय अलि आलम मियालाई चाबहिल भत्केको पुल बाट पक्राउ गरिएको प्रहरीले जनाएको छ ।
साथै अनुसन्धानको क्रममा प्राप्त भएको सिसिटिभी फुटेजलाई अध्ययान गर्दा चोरी गर्ने क्रममा देखिएको Avenger मो.सा. रोकी सोधपुछ गर्ने क्रममा निज चोरीमा संलग्न ब्यक्तिहरुले प्रहरी बाट उम्कन AP1 टेलिभिजनको प्रेसकार्ड देखाई आफुलाई पत्रकार हो भनि समेत बताएको र निजको झोला चेक गर्दा चोरी गरेका बिभिन्न ब्राण्डका ल्यापटप र क्यानोन क्यामेरा , नगद रु ५३,००० र अमेरिकन डलर ३०० तथा चाईनिज युयान २०० र धारिलो हतियार समेत फेला परेको हो । सो सम्बन्धमा हाल महानगरिय प्रहरी बृत्त गौशाला बाट थप अनुसन्धान कार्य भईरहेको प्रहरीले जनाएको छ ।
उनीहरुवाट बरामद सामानहरु – १) Apple कम्पनीको ल्यापटप १, २) Apple कम्पनिको I pad थान २, ३) मोवाईल बिभिन्न ब्राण्डका ६, ४) धारिलो हतियार ३ थान, ५) प्रोजेक्टर थान २, ६) Canon क्यामेरा १, ७) बा.२७ प.९४९० नम्बरको Avenger मो.सा. थान १, ८) AP1 को प्रेस कार्ड रहेको महानगरिय अपराध महाशाखाले जनाएको छ ।
